CEUS APP, premiada no II Encontro de Emprendemento celebrado no Mercado de San Agustín, na Coruña
CEUS APP foi recoñecida como proxecto máis innovador no II Encontro de Emprendemento, unha iniciativa do Concello da Coruña para impulsar novas iniciativas empresariais.
O sábado 29 celebrouse no Mercado Municipal San Agustín, na Coruña, o II Encontro de Emprendemento, unha iniciativa do Concello que incluíu charlas inspiradoras, exposicións, networking e mesas redondas.
Na xornada, que contou coa presenza da concelleira de Emprego, Comercio e Mercados da Coruña, Diana Cabanas, repartíronse 8.000 euros en premios. Un dos proxectos premiados foi CEUS APP, segundo os seus creadores, “a primeira aplicación do mundo que pon en contacto aos bañistas co servizo de socorrismo”.
Recoñecemento á innovación de CEUS APP
CEUS APP ofrece un sistema de navegación que permite localizar ás persoas que dan a voz de alarma, ademais dun servizo con datos actualizados sobre as condicións dos areais, a cor das bandeiras e a exposición a perigos.
A plataforma tamén centraliza alertas, partes de incidencias, control de horarios e protocolos de actuación, incorporando análise de datos con intelixencia artificial.
A concelleira fixo saber que “dende o Goberno local queremos premiar a creatividade e a iniciativa dos coruñeses e coruñesas que emprenden un negocio, apostando polos seus proxectos e dándolle visibilidade a través de iniciativas coma esta”.
Tamén lembrou que a alcaldesa, Inés Rey, estableceu como prioridade desde o 2019 a implantación de políticas de respaldo ao emprendemento.
O evento dirixiuse a entidades que traballan no ámbito do emprendemento e a proxectos empresariais que iniciaran a súa actividade a partir do 1 de xaneiro de 2023, sempre que desenvolvesen a súa actividade no termo municipal da Coruña.
Premios entregados no encontro
O encontro ofreceu un espazo de exposición e interrelación entre emprendedores, entidades e Concello, promovendo a cultura emprendedora, o intercambio de experiencias e a posta en valor dos recursos locais.
- Premio ao maior impacto local, 1.000 €: Proxecto Ayendo, asesorado por AECO.
- Premio ao maior impacto local, 1.000 €: Proxecto Lo Próximo, asesorado por Cámara de Comercio da Coruña.
- Mellor proxecto de economía social, 3.000 €: Proxecto Tako Group, asesorado por Unión Espazo Coop.
- Proxecto máis innovador, 3.000 €: CEUS APP, asesorado pola UDC.
A selección dos proxectos gañadores realizouse por unha comisión de valoración composta por persoal técnico municipal e representantes das entidades participantes.
Os criterios de valoración incluíron a madurez da idea, a innovación, a viabilidade técnica e económica, a experiencia do equipo e o impacto territorial.
Un artigo escrito por: S.P.
Fonte: Código Cero Ver noticia orixinal